政情：工記風車陣 甩皮甩骨

鄧家彪郭偉強直選擔大旗

距離未來兩場選舉仲有幾年，有憂患意識嘅工記密密諗計做好前期選舉布陣工作，點知即食檸檬。消息指，工記最近曾鼓勵葉偉明下屆再戰新東，但得到嘅回覆係傾向不再捲土重來，寧願專注工會工作，睇怕如果無重量級人物能令佢回心轉意嘅話，意味工記又少個打得之人可以領軍。

此外，工記多名現屆議員年紀偏大嘅現象亦不容忽視，事關嫻姐同王國興倘二○一六年立法會再度上陣，將以六十九歲同六十七歲之齡參選，體力能否負荷屬未知之數，因此二人係咪會披甲再戰無人說得準，加上政圈要求政府重劃立法會地方選區由「五變六」嘅呼聲有增無減，倘連同超級議席同兩個近年均由工記囊括嘅勞工界議席，工記能否一下子搵到近十人領軍參選，呢個真係無人敢拍心口「寫包單」。

面對呢個疑似青黃不接嘅情況，消息指，兩名年僅三十多歲嘅勞工界議員鄧家彪同郭偉強，轉戰直選之路毫無懸念，關鍵只係落戶邊個地方選區，工記相信只要佢哋繼續提升議政論政火候，佢哋擔大旗之日係指日可待。

至於其他冒出頭來嘅工記新星，據聞工記傾向搵啲可以鋪路直選嘅新星上位，所以多名新界西地區樁腳料有光明前景。另外形象專業嘅工聯會副理事長梁頌恩同銀行業僱員協會主席李麗貞，近年雙雙走勢凌厲，話唔定未來都有機會更上一層樓。不過，數來數去風車陣都仲係有啲葉無咗，工記真係要認真諗吓有乜解決辦法至得喇！