中環出更：馬唯中拖手仔睇藝術展
卓妮前日喺一個鐘錶活動上，赫然見到一位稀客，佢就係台灣的總統馬英九千金馬唯中（Lesley），佢與型男老公蔡沛然（Allen）結婚後，選擇喺香港定居，愛巢就喺中環堅道。卓妮早前見過Lesley幾次，佢都打扮得好樸素，又戴住黑框眼鏡遮住粉臉，勁低調。前晚佢終於除低眼鏡，略施薄粉，着上一件簡約嘅黑色連身裙，同老公Allen十指相扣出席愛彼錶活動，勝在氣質清新脫俗。
梁青華「唔覺」台第一千金
當晚派對係慶祝愛彼錶成為巴塞藝術展贊助夥伴，喺全球合作舉辦現代及當代藝術展，第一個登場嘅係正在香港舉行嘅首展。Lesley一向醉心藝術，仲取得紐約大學博物館系碩士學位，所以就算幾唔想高調，都話要現身去感受吓。
當晚去趁熱鬧嘅仲有「玩具大王」蔡志明囝囝蔡加讚、九巴後人雷兆光及太太雷林靜怡等。
前香港鐘錶業總會主席梁青華都有到場，卓妮問佢有冇見到台灣第一千金，佢恍然大悟話：「唔覺喎！」
卓妮