中環出更：余嫿做「制服天后」為設計界發聲
制服一向予人沉悶死板之感，新加入香港菁英會嘅十大傑青兼著名時裝設計師余嫿（Mary），最近就寓興趣於慈善，致力為各慈善機構及商會設計制服、會服，一於將老土化為時尚。Mary笑言，期望能夠成為新一代「制服天后」，協助提升本港服務業嘅形象，又希望立法會加設一個設計界功能界別議席，代業界發聲。
Mary對制服設計產生興趣，緣於一次接到某商戶嘅訂單，希望為旗下員工設計一套制服。後來員工對佢嘅設計讚不絕口，着得不知幾開心，令佢感到鼓舞，至今已為逾十個品牌設計制服。Mary話，設計制服不比時裝容易，要靚之餘，更要考慮制服嘅工種及功能：「設計畀食品公司員工嘅制服，選用嘅物料要夠耐用，加上佢哋工作時動作較大，件衫會設計得長啲，雙手遞高時就唔會咁易露出腰部。」
倡增設業界議席
Mary早前回到母校沙田賽馬會體藝中學，義務為師弟師妹設計校服，身為雲南人嘅佢，又為雲南旅港同鄉會及傑青會設計新形象。佢話，其實香港設計師並不遜色，可惜欠缺同政府溝通嘅渠道，認為現時立法會只得紡織及製衣界議員，設計師又唔屬於紡織界，未能代表設計業界發聲。佢建議加設一個設計界議席，讓設計師與政府之間多個平台溝通，相信會對本土嘅創意事業發展好有幫助。
卓妮