大家有冇聽過有一種石斑魚以香港命名？如果冇聽過，咁就等功夫茶講畀你聽。呢一種魚名為紅斑，英文叫做Hong Kong Grouper，學名就係Epinephelus akaara。之所以冠名Hong Kong，原因好簡單，以前外國遊客一到香港食海鮮，觸目所及數量最多就係呢一種顏色鮮紅嘅石斑，久而久之口耳相傳Hong Kong Grouper成為香港嘅「代言魚」。
好嘞，功夫茶問問大家，今時今日仲見唔見到咁有代表性嘅香港之魚呀？如果你有幸見到，睇怕你真係鴻運當頭，事關紅斑買少見少，已經處於有錢都未必食得到嘅瀕危水平。紅斑瀕危嘅原因好簡單，食家濫吃，漁民濫捕，搞到呢一種以香港命名嘅石斑魚有機會淪為不再存在嘅集體回憶。
香港大學太古研究所海洋和淡水生物研究學者薛綺雯（Yvonne Sadovy）教授領導嘅研究隊伍蒐集數據，加上實地考察得出結果，石斑魚類一直受到濫捕，全球一年捕獲最少九千萬條，一百六十三種石斑魚當中，有百分之十二共二十種面臨滅絕威脅。八種喺香港有售嘅斑類處於瀕危、易危或者近危水平，包括紅斑、西星同老鼠斑等等。
港大報告指出，過度捕撈、欠缺規管以及保育欠佳係造成石斑魚瀕臨滅絕嘅主因，即使人工養殖，好多時候都係先捕撈幼苗再養，搞到野生幼苗聚集稀少。石斑市場每年總值相等於七十八億港元，漁民見錢開眼導致一網打盡嘅過度捕撈。正所謂物以罕為貴吖嘛，漁護署統計顯示今年二月野生紅斑每公斤平均批發價超過一千元，你都咪話唔得人驚！
負責研究嘅學者就話嘞，香港同內地對於石斑嘅需求好大，不過相關法例經已過時，未能遵守國際公約同協定，政府應該盡快立法規管海鮮出入口數量，保護瀕臨絕種生物，並且鼓勵市民轉食可持續捕撈物種，以免石斑消失殆盡。
所謂立法規管，即係節制人類無窮無盡嘅食欲。你知啦，民以食為天嘅中國人乜都吞落肚，你唔立法規管，真係會食到某一種生物絕子絕孫o架。好似毛里裘斯咁吖，曾經有一種體形龐大又唔會飛嘅渡渡鳥，就係因為人類毫無節制捕而食之，終於喺地球消失得無影無蹤。
收到未呀，環境局局長黃錦星？為免石斑成為歷史名詞，立法規管實在事不宜遲。計功夫茶話齋，立法規管最低限度要禁止漁民一網打盡，成魚捉嚟食就話無可厚非啫，若然未成年幼魚都唔放過，真係好對唔住地球生態o架！