三十六名港區全國人大代表每年都有「一長一短」考察行程，但有時並非佢哋想去就去，都要配合天時地利人和，事關佢哋近年曾先後兩次想組團到四川考察，但兩次不約而同因四川有地震而要更改行程。另外去年又因重慶發生「薄熙來事件」，要取消到重慶視察，所以人大考察團近年計劃行程確係阻滯多多。
話說二十多名港區人大最近啱啱完成粵西茂江同湛江嘅短程考察，原定佢哋會喺今年九、十月間到四川長程考察，但最新消息指呢個建議已束之高閣，最新建議係去吉林。有港區人大私下表示，依家去唔成都未必係壞事，免得影響當地有關方面要分心接待佢哋，因而怠慢咗相關善後工作喎。
查實今次並非人大考察團首次遇到阻滯，因為早於五年前，港區人大就想到四川考察，但撞到當年汶川大地震要改到山東考察。及至去年，港區人大一心想到重慶考察，點知突然爆出「薄熙來事件」，最終改行程到雲南訪問，如果計埋今次再去唔成四川，已經係人大考察團六年內第三度要改考察地點喇。