鄧惠鈞（June）出任新聞統籌專員（IC）未夠九個月，就以健康欠佳為由請辭，可惜June八個月以來為特首梁振英（CY）「拆彈」不成，今次閃電辭職更引發外界關注，都唔知仲有冇人肯捱義氣入政府呢個「熱廚房」。一眾立法會議員聽聞消息不但袖手旁觀，更加七嘴八舌亂評一番，其中陳婉嫻就話眼矇耳鳴「好common（普遍）」，自嘲成日都眼矇矇，暗諷June唔係身體唔好咁簡單。
田北俊就懷疑June係以眼矇耳鳴作比喻，暗示喺心戰室咩都聽唔到、睇唔到，長期被投閒置散下而心淡劈炮唔撈。電視台記者出身嘅劉慧卿同June「識於微時」，佢話尊重June以健康原因辭職，但就硬係要補多句「可能同CY合作唔愉快」，又話每當有高層離職，都會引起好多猜測o架啦。
議員評論嘅多，但係都不約而同話June出任IC咁耐，都冇主動咁接觸過佢哋，所以一切嘅評論，其實都只不過係估估吓。
議員都係議政能手，觀微而知著，睇現象就知問題，至於佢哋有無講中佢辭職嘅真正原因，就真係得June自己先知喇。