政情：立會大樓特登漏水
立法會早前因為社民連梁國雄辦公室一場小火，消防自動灑水系統啲水不斷流向下層，搞到五層樓濕晒，令人懷疑立法會新大樓係咪因趕工而變成豆腐渣工程。尋日行政管理委員會就討論事件，仲邀請埋三位負責官員到立法會解釋。聽完之後先至知，原來漏水係特登嘅，真係估你唔到。
指可防其他樓層着火
有行管會成員引述話，建築署解釋門窗同地板之間留有空隙，係因為要預留空間畀建築物料冷縮熱脹，所以樓上嘅積水先會向下四圍漏。至於點解啲水可以漏落下面五層樓咁多，同埋個自動灑水系統點解會狂噴水。政府官員解釋得仲神奇，話漏咁多水係意料之內，咁做可以係防止其他樓層着火，令火勢可以得到全面控制喎。
至於灑水系統狂噴，原來並無失靈，當日足足噴咗半個鐘頭，本來立法會保安可以閂水掣，但保安驚火勢死灰復燃，點都要等到消防員到場至肯閂水掣，所以搞到立法會好似濕地公園咁。今次漏水風波，唔少議員都損失慘重，到底有冇得索償呢？據聞只要係立法會資產、用公帑購買嘅所有物資都有得賠，但議員嘅私人物品有損失就冇得賠喇，講到底都係長毛累街坊。