立法會「拉布戰」唔係泛民獨有權利，民建聯早在九十年代末已經用呢招，估唔到連自由黨都諗住用。自由黨榮譽主席劉健儀（Miraim）認為，現時《議事規則》第九十二條賦予立法會主席太大權力，幾時剪布由主席自己演繹，如果將來該黨喺標準工時立法時拉布，分分鐘被主席剪咗布都唔知喎。
Miraim話，該黨話唔定喺審議標準工時時拉布，所以基本立場係認為立法會要有完善剪布機制，唔係主席想點剪就點；佢建議設立終止辯論動議，只要經分組點票通過後就唔准再發言。
自由黨之前既唔支持拉布，亦都冇參與聯署要求主席剪布，依家又話將來有可能拉布，佢哋嘅立場真係難以捉摸。
雖然Miraim冇做議員，但佢未來會繼續主力政策研究，至於剛剛結束嘅黨魁選舉，田北俊就在無對手之下自動當選，成為自由黨第一名黨魁，日後會負責議會內嘅投票立場。
至於地區工作，就會交由黨主席周梁淑怡搞晒，三人咁樣分工法，有冇效就等大家拭目以待喇。