政情：霍啟剛踏「青」雲路
作為中華全國青年聯合會（全國青聯）跳板嘅香港青年聯會（青聯），一向係政商界名人二代集中地。有消息話，去年底迎娶「跳水公主」郭晶晶嘅港協暨奧委會會長霍震霆公子霍啟剛，按照繼任人選嘅次序將以大熱姿態接任青聯主席，加上兩年之後係全國青聯換屆之時，分分鐘有望更上一層樓進身全國青聯副主席。
青聯主席任期規定每屆一年，但都有例外嘅，好似現任青聯主席葉振都去年就「捱義氣」，冧莊做多一屆，睇怕今年年中都要退位讓賢。據聞青聯主席呢個位，將會係現任常務副主席霍啟剛嘅囊中物，事關去年一早熱傳佢會接棒，只不過佢當時想首先成家立室完成人生大事，先決定暫不接任青聯主席一職。事隔半年後，啟剛人生大事圓滿完成，如無意外會於七月起接棒做青聯主席，有傳佢仲會做足兩年添！
全國青聯副主席熱門人選
青聯主席一職塵埃落定後，另一邊廂全國青聯副主席之爭隨即開始上演。眾所周知，依家全國青聯副主席有兩個香港代表名額，分別由製衣大王陳元鉅兒子陳仲尼同新世界發展執行董事兼聯席董事總經理鄭志剛擔任，前者由於今年三月「升呢」為全國政協委員，料很大機會喺兩年後卸任全國青聯副主席，相反鄭志剛仲年輕力壯，有可能再度連任，因此兩年之後全國青聯換屆，料最少有一個空缺畀香港年輕才俊爭崩頭。
由於歷來全國青聯副主席嘅香港代表，幾乎都由香港青聯主席出任，因此即將卸任主席嘅葉振都，以及好大機會接任主席嘅啟剛，順理成章成為未來全國青聯副主席嘅熱門人選。值得一提嘅係，菁青會創會主席施榮忻同金至尊數碼行政總裁吳傑莊亦有機會異軍突起，事關前者做青年工作近十載，取得一定成績；至於後者近年亦活躍於青年事務，加上獲全國政協委員黃英豪力撐，亦有力喺兩年後落場一試身手。
究竟邊個最後會順利跑出，某程度係要視乎佢哋團結青年工作方面能否得到各方認同，但係亦有人話有關人選同本身家族背景有密切關係，有冇捐錢支持內地青年工作成為關鍵因素，所以並非一味做青年工作就有得上位，世界就係咁現實o架喇。