中環出更：郭少明自爆曾「通波仔」
心臟血管塞咗可大可小，莎莎國際主席郭少明（Simon）尋日出席科技大學嘅科研發布會時，就自爆喺五、六年前通過波仔，心臟血管放咗兩個支架，所以依家好緊張身體，仲話「保養自己好重要」，每日磅重一次，一旦重咗就會注意吓喇。
捐錢研發自然分解支架
Simon坦言，有支架喺身上，硬係覺得「有啲嘢」，唔係咁好，所以佢聯同太太郭羅桂珍捐咗五百萬元畀科大，科大花兩年時間，終於研發到一啲會自然分解嘅支架，造福腦中風病人，話唔定遲啲就到心臟病人受惠。Simon尋日同太太出席有關科研項目捐贈儀式，差唔多全家出動支持，包括大女郭詩慧同老公陳振邦、二女郭詩雅同郭老太都撐場，前教育局局長孫明揚太太鍾小芬都去支持老友善舉。
鍾小芬就話，孫公退休生活好「他條」，精神又好，腎病情況都穩定，依家最忙就係同七歲及八歲孫仔捉棋，如果身體再好啲，可能去做義工添。孫太同孫公得閒就周圍搵好嘢食，最鍾意去銅鑼灣食餛飩麵，但擔心會食肥咗，所以有時都會拍拖去上環中山紀念公園散步，強身健體喎。