中環出更：「心蓮心」籌款 撐單親婦女
名媛團結起來，能頂半邊天。由城中名太組成嘅慈善團體「心蓮心」，尋日喺中環一間酒店舉行慈善午宴，Adler珠寶董事總經理何彭慧嫻（Patti）同李錦記新抱Mahnaz Lee帶頭行善，為貧困無助嘅單親婦女籌款。Patti慨嘆香港表面富庶，但唔少婦女一旦失婚，生活便捉襟見肘。
午宴上，Patti展出數百件珠寶，名太買幾多，佢就捐出盈利嘅百分之十畀「心蓮心」。籌得嘅善款，將為單親或離婚婦女提供英文、陪月或刺繡課程，助佢哋自力更生。Patti話，曾遇過一個離婚婦女，不但要獨力撫養兒子，還不時遭前夫騷擾，報警投訴前妻只顧工作，疏忽照顧兒子，認真淒涼，所以佢幫婦女絕對義不容辭。
印度名媛 一呼百應
唔少印度名媛亦一呼百應，Purviz Shroff一到場，二話不說捐出五十萬元。豪門新抱Mahnaz Lee亦身體力行行善，不時走去葵涌、黃大仙區探訪，雖然小時候留學美國，但Mahnaz居於港逾卅年，早已視香港為家，一有時間唔係行街扮靚，而係做善事幫香港人。
「心蓮心」董事之一嘅印度富商夏利里拉新抱Avisha Harilela都落力叫人捐錢。外表洋化嘅Avisha，從小在港長大，廣東話流利過唔少地道香港人，還改了中文名「夏慧珊」。佢對港人身份好自豪，拎出一張回鄉卡畀卓妮睇，證明自己係百分百港人。
卓妮