好消息！好消息！真係一個人間有愛嘅好消息！
有一位為家人勞碌大半生嘅好媽媽，今年二月確診患上缺血性心臟衰竭，由於發現太遲，所以乜都冇用，惟有施行換心手術先至有生存嘅希望。你知啦，心臟移植從來唔係一件容易嘅事，如果冇人捐出寶貴嘅心臟，病人凶多吉少o架。
等待換心救命嘅係五十八歲嘅黃麗娟，丈夫譚國明同兒子譚駿禮喺母親節前夕祈求上天開恩，賜畀呢位賢妻良母一個健康嘅身體，作為最好嘅母親節禮物。東方報業集團一向熱心公益，多年來助人無數，《東方日報》同《太陽報》當然義不容辭，一而再、再而三為黃女士呼籲，希望善長仁翁伸出援手並且獻出善心。卒之皇天不負等心人，等待延續生命嘅一家人得到醫院通知一個天大好消息：有人願意捐出心臟！
彰顯大愛精神嘅係一位四十幾歲中年男子，因為腦出血不幸於伊利沙伯醫院離世。死者家屬悲天憫人，不但同意捐出佢嘅心臟，連肝臟、腎臟以及一對眼角膜亦都無私贈予有需要人士。
得到呢一個天大喜訊，移植手術當然火速進行啦。負責手術嘅係瑪麗醫院心胸外科主管區永谷，佢話雖然捐贈者體形較黃麗娟大三分之一，但係如果再唔換心，病情有機會突然惡化，加上使用體外心室輔助器時間愈長，凝血功能愈弱，不停輸血亦會令血液抗體水平上升，增加日後換心嘅排斥風險，所以決定即時為病人移植心臟。
手術歷時六小時，區永谷排除萬難，為病人換上一個浴火重生嘅心臟。手術整體仍算順利，黃麗娟術後情況穩定。丈夫譚國明感激東方報業集團嘅呼籲，當然更加感激捐贈者嘅無私奉獻啦。譚國明仲發表愛妻宣言：「以後一定會一直陪住太太，好好照顧佢，唔會再畀佢操勞！」
唔好怪功夫茶賣花讚花香，《東方日報》長期高踞全港銷量冠軍，《太陽報》持續處於強勢第三位，實在係難能可貴嘅社會之福，事關銷量好等於讀者多，讀者多等於回響大，呼籲善長仁翁伸出援手自然一呼百應，除咗今次好媽媽得到換心救命之外，以前亦都試過好多次創造奇迹，唔少人來回地獄又折返人間。
計功夫茶話齋，正正係東方報業集團同廣大讀者心連心，先至可以共同彰顯人人為我、我為人人嘅大愛精神，造就心換心嘅感人故事。既然大家心心相印，咁就要繼續創造一個接一個嘅重生奇迹。簡單咁講，捐贈器官係一件非常值得鼓勵嘅善事，救人一命勝造七級浮屠，遺愛人間等於流芳百世！