行政會議今日將暫停開會一次，惹起各方揣測。其實行會周二唔開會並唔係咩新鮮事，例如人大兩會期間，或施政報告公布前夕嘅周二都唔開會，但奇就奇在尋日特首辦罕有解釋，取消會議係因為「沒有議程」，結果「開誠布公」變成愈描愈黑，仲成為各方「抽水」目標。
廠商會代表林大輝話感到好憤怒，事關議員流會就受千夫所指，但特首就可以搞流會，隨意取消行會，相當唔公平；亦仲有議員話感到好震驚喎。
見到班立法會同事抽水抽得咁開心，一眾「雙料」議員就不得不現身護駕。新民黨葉劉淑儀率先挺身而出撐政府話，無議程唔代表社會無問題，仲「微調」話今日唔開會只係因為「唔夠item（議程）」，並唔係無議程，又話政府有啲文件未準備好，所以先唔開會。
不過，葉劉就話唔係講免費電視發牌文件，又話唔開一次會唔會影響免費電視發牌程序云云，亦唔係要保護連日被傳媒追訪嘅張震遠。
另一「雙料」議員李慧琼就話，上星期二都好似有人提過今個星期二有可能唔開會，佢又話，行會周二開會都唔係鐵板一塊喎。