政情：薑葱「屈李」譚志源瘀爆
二○一五年區議會選舉將增加十九個民選議席至四百三十一席，可以話係塵埃落定。尋日政制及內地事務局局長譚志源（Raymond）按照慣例到立法會解釋，但佢講講吓就借十八區區議會過橋，話上星期見過一眾正副主席後，所有區議會都支持增加議席。不過，熟悉地區嘅工聯會陳婉嫻發覺唔對路，即時打畀黃大仙區議會主席李德康問個究竟，發現原來係Raymond想瞞天過海。
嫻姐炮轟造假 事件冰山一角
現場所見，嫻姐怒氣沖沖走入會議廳，炮轟Raymond造假，話地區人士對今次區議會新增議席有好大意見，認為喺啟德舊機場嗰三百公頃土地，唔應該撥歸九龍城區議會，應該畀番黃大仙區議會至啱，可惜Raymond好似借咗聾耳陳隻耳咁，完全當聽唔到地區人士意見。嫻姐即場拆穿Raymond想借區議會過橋後，在場議員都Ｏ晒嘴，估唔到嫻姐咁認真。
Raymond被踢爆後都知衰，唔敢再死撐，惟有面懵懵話返去再睇睇當日班區議會主席講咗啲乜，嫻姐見佢肯認衰，都收手冇再插佢。不過，相信今次Raymond薑葱「屈李（李德康）」事件只係冰山一角，冇人幫手喺立法會出頭嘅主席大有人在。
其實尋日呢場政制事務委員會，基本上演變成不同議員爭取本身利益嘅聲討大會，例如一心諗住直選嘅廠商會林大輝就要求政府快啲講清楚幾時劃區，否則有志服務市民嘅人根本冇時間做備選。本身兼任葵青區區議員嘅麥美娟就質疑政府「大蝦細」，點解葵青區人口增加都唔可以增加議席喎。
葉國謙離奇倡離島區加議席
講到最離奇首推區議會功能界別葉國謙，佢竟然建議離島區要加議席，因為有部分大島嶼得一個區議員服務村民，區議員要走來走去好麻煩喎。今鋪終於畀Raymond威番次，佢話離島區以人口推算，應該減議席至真，現時可維持咁多個議席已經好好，如果加議席即係違背政府政策方針。葉國謙無喇喇建議離島加議席，確係耐人尋味，究竟佢背後有乜動機呢？