中環出更：「舊電池」李國寶買老餅CD
曾被封為立法會「四大懶蟲」之一嘅前金融界議員、東亞銀行主席李國寶，自從被業界「開刀」換走之後，唔使再返立法會瞌眼瞓，自然多咗時間周圍hea。前日黃昏時間，卓妮就喺金鐘一間專賣英文唱碟嘅店舖內，見到佢喺度地氈式搜索心水唱碟。睇真啲，原來佢只對舊情歌情有獨鍾，唔舊都唔揀，果然係過氣嘅「舊電池」老餅。
「西洋古典專區」慢慢揀
當日下午六點幾鐘，着住西裝嘅李國寶一支公現身金鐘太古廣場，走入一間唱碟店舖搵唱碟。見佢對流行曲及推介歌曲一欄毫無半點興趣，急不及待走進店內嘅「西洋古典專區」。佢以前出席立法會鍾意「快閃」，之但係睇自己鍾意嘅唱碟就唔同喇，慢條斯理咁耷低頭慢慢睇、細心揀，逗留咗超過十五分鐘。最後佢揀咗一疊唱碟，走到收銀處付款。
卓妮仲見到佢手上嘅唱碟至少有四隻，有純音樂嘅亦都有視聽兼備嘅演奏會，仲有隻《OLDIES 101》經典金曲，共通點就係全部都咁老餅，啱晒佢啦！