中環出更：王大業煙癮起停車「叉電」
「皮草太子爺」王大業（Andy）為Ball場常客，應酬食番口煙唔少得，而且煙癮應該唔細。卓妮早幾日就喺中環見到着得好四正嘅Andy揸住架豪華跑車，載住一位男友人於鬧市中穿梭。期間二人忽然煙癮大發，Andy於是將跑車停喺ifc商場附近嘅非泊車位，企埋一邊取出香煙，並以三分鐘極速「叉電」後快閃上車走人，整個過程乾淨利落。
駕名貴跑車 惹人注目
當日下午六點鐘，着住禮服、打煲呔嘅Andy現身ifc，佢揸住心愛嘅藍色瑪莎拉蒂（Maserati）豪華跑車出巡，同車仲載住一位男友人。價值逾百萬嘅靚車現身鬧市，當然甚為矚目，唔少路人都好奇望多兩眼。不過，Andy一於好少理，掛住同老友傾閒偈。當跑車駛至商場近連鎖超級市場嘅後門，Andy突然將車泊埋一邊，仲同男友人急急落車。
行得咁急，原來係煙癮大發，佢哋走到後門較隱蔽位置，各自拎出一支香煙，Andy點着支煙後，大啖大啖咁吸，左手就插住褲袋保持「chok」樣，期間同老友有講有笑。不出三分鐘，Andy已經將香煙吸到盡，望勻周圍都冇煙灰缸，索性將煙頭拋到地上，再熟練地用腳踩熄，但佢有冇執番個煙頭就唔知喇。
由於佢哋身處嘅位置唔可以泊車，當時已經有商場保安走近勸喻離開，Andy隨即同老友飛快登上跑車，嗱嗱聲走人。據聞當晚Andy係獲邀出席一個晚會，唔知係咪怕到時冇機會「打邊爐」，所以趁入場之前「叉電」呢？
卓妮