一個曾蔭權係特區之首，一個湯顯明係廉署之首，兩個首長級高官本來應該以身作則，為香港得來不易嘅廉潔奉公鞠躬盡瘁。點不知特區政府墮落成性，前特首曾蔭權變咗貪曾，前專員湯顯明淪為貪湯，兩個同撈同煲嘅難兄難弟貪得無厭，唔理係大便宜定係小便宜，佔咗便宜先至算。
醜婦終須見家翁，貪湯龜縮咗一段時間之後，卒之蒲頭面對立法會政府帳目委員會聆訊。哈，原來呢個官場老油條「集開埠以來失職卸責高官之大成」，最少用咗七招太極推手迴避提問，包括「拉布燒時間」、「賴冇時間消化」、「查資料賴上手」、「講古遊花園」、「扮懵詐唔知」、「賴刑事調查」以及「谷眼淚扮慘」，搞到一眾希望揭開貪腐真相嘅市民大失所望。
貪湯自己顧自己迴避提問都算嘞，更加令人感到氣憤嘅係，呢一個過氣廉政專員在任期間涉嫌包庇貪曾，廉署事隔一年有多仍然未起訴「痛心特首」，亦都至今未有任何交代。喂，曾蔭權同湯顯明識於微時，加上兩人沆瀣一氣嘅貪腐作風，真係好難唔令人懷疑官官相衞喎。
「東方報業民意調查」顯示，貪湯同貪曾嘅貪腐行為同出一轍，但係廉署只係高調調查湯顯明，四成七受訪者批評做法不合情理；兩成六認為涉嫌選擇性執法；兩成一質疑當局想轉移視線放生曾蔭權。
調查亦顯示，四成六受訪者認為曾蔭權貪腐事件表面證據成立，但事隔一年多廉署仍未起訴，欠公眾一個交代；兩成六覺得廉署一再拖延不尋常；兩成三相信會損害廉署聲譽。
嗱，即係咁，廉署冇錯叫做正在調查貪曾，之不過查得好低調，十足十學似警務處咁樣「低調通緝」個別示威人士，相對於調查貪湯嘅高調，情況截然不同。功夫茶想知道嘅係，無論調查貪曾有幾低調，幾時先至有一個查清查楚嘅結果呀？東方報業集團獨家踢爆曾蔭權同城中富豪過從甚密已經係舊年嘅事，莫非要查到現任專員白韞六頭髮白晒先至水落石出？如果白韞六確係秉公辦理，連前任專員湯顯明都唔放過，咁就唔該認真嚴拿前任特首，唔好畀人一個錯覺，特首嘅意思係視法治如無物嘅特權之首。
今時今日嘅偉大祖國都識得講啦，不反貪防腐就會亡黨亡國，所以有必要蒼蠅老虎一齊打。香港既然自稱「勝在有ICAC」，唔打貪曾呢一隻大老虎點對得住列祖列宗呀？若然嚴拿蒼蠅，竟然放虎歸山，ICAC無異於自拆招牌。
一句到尾，貪湯固然必須徹查清楚，貪曾不容繼續逍遙法外！