政情：收料站：阿柱聘學聯前秘書長
社運界新血近排成為工黨瞄準吸納嘅目標，繼吸納咗民陣前召集人、最近去咗英國讀書兼減肥嘅黎恩灝做黨員後，工黨立法會社福界議員張國柱（阿柱）嘅辦公室最近亦吸納咗另一個民陣要員做「主任」，佢就係現任民陣副召集人、學聯前秘書長陳倩瑩（Daisy）。
做咗研究主任半年 未入工黨
尋日Daisy喺民陣嘅記者會上派新卡片，畢業無耐嘅佢原來最近去咗幫阿柱做政策研究主任，唔經唔覺都做咗超過半年。Daisy話，佢目前專注幫阿柱做議會工作，主力研究社會福利同人口政策，即係開正政府嘅「重中之重」，睇嚟中大政治及行政系畢業嘅Daisy，喺呢份工應該都有好多發揮空間。
不過，呢個吸納過程尚未完成，事關Daisy目前只係工黨名下嘅一名打工仔，仲未入黨。據Daisy嘅老細阿柱話，原來當日Daisy係自薦做研究主任，阿柱講到Daisy呢位員工，即刻讚不絕口，大讚對方又勤力又交足功課，仲話Daisy時間管理非常好，從來都唔會因為搞社運而返唔到工喎。