政情：廢腑之言：「失匙夾萬」 財爺比喻不倫
自嘲係幽默嘅其中一種做法，而幽默感又係從政人物必備技巧，個個禮拜日喺網上寫文嘅財政司司長曾俊華（鬍鬚曾）工多藝熟，終於學識寫文章時幽自己一默。佢話政府雖然坐擁七千幾億元儲備，但形容自己只係「失匙夾萬」，唔係話想點就點，政府每動用一分一毫都要得到立法會批准。
若議員係「鎖匙人」 使乜拉布？
講到咁慘情，咁到底邊個先可以開啟呢個千億夾萬呢？鬍鬚曾話立法會議員先係鎖匙人，立會一日未通過預算案撥款，政府有錢都無得使，亦唔可以為各項公共服務提供資源。鬍鬚曾呢個講法有少少偷換概念，如果議員真係鎖匙人，長毛等激進派老早就打開庫房夾萬，每位市民派幾萬蚊啦，仲邊使咁辛苦去拉布。