政情：八網難逃：「恐怖片」爭取天水圍建街市
天水圍車費、物價貴眾所周知，乜呢區仲好猛咩？元朗區議員黃卓健（Legward）尋日喺社交網站上載咗一段長約三分鐘嘅恐怖片，不斷咁話天水圍好猛，猛得好嚇人。原來佢係講緊呢區物價猛咁加，加得太恐怖，片段仲剪輯本地一套驚慄戲，話有人偷食雞髀，因為天水圍嘅雞髀比灣仔區貴四成添。所以政府一定要起番個食環署街市，收商戶平啲租，市民先可以買到平嘅食物。
Legward呢次仲搵埋地同計晒數咁話，可以喺天水圍南北中心，天壇路及天瑞路交界建街市，交通方便之餘，惠及六分一天水圍人口，而政府只需用六千萬元建街市，四千萬元營運就搞掂喇。咁啱一億元，咪即係只要區議會通過社區重點項目計劃就可以起到街市？
元朗區會今特別開會
其實呢個可以話係大部分選區位於天水圍嘅元朗區議員嘅願望，但據聞元朗區想起綜合服務大樓喎，結果係點？相信今日元朗區議會舉行嘅特別會議自有分曉。