政情：鄭承隆稱要結婚避嫌
政黨若要擴大自己嘅影響力，梗係要搵多啲新血加入啦！新民黨最近就有二○一○年中國小姐香港賽區冠軍趙哲妤（Uny）入黨，但該黨自此滿城風雨，有人質疑Uny入黨嘅目的，又有人指佢嘅形象對黨有影響。不過，被再多人話都唔緊要，最重要係有人撐，連副主席鄭承隆（Edwin）都力撐，咁就更加冇問題啦！不過，Edwin唔怕女朋友呷醋咩？怪唔得佢上次見到我哋時，都笑住咁話，要快啲同女朋友拉埋天窗避嫌啦！
指「不招人忌是庸才」
新民黨青委會主席甘文鋒日前，喺社交網站發表一篇長達八百字支持Uny入黨嘅文章，話政黨嘅形象，喺支持或反對某啲政策時已受影響，議員發言又會有影響，所以如果以有負面影響就否定一個人嘅話，咁就乜都唔使做。而Edwin就喺嗰篇文章下留言，話日久見人心，「不招人忌是庸才」，作為副主席，再多攻擊都願意同佢哋一齊承擔咁話。其實之前當有啲人批評Uny時，Edwin已用自己作比喻，話就算只有三分鐘熱度，都起碼貢獻過三分鐘吖，呢位副主席真係予黨友無限量支持喎。