觀塘坪石邨下星期日舉行區議會補選，並由啓業邨屋企徒步過嚟嘅梁國雄（長毛）硬撼民建聯陳鑑林（橄欖）囝囝陳俊傑（傑仔），以填補該區前區議員陳百里出走政府嘅空缺。今次長毛空降上陣仲大搞造勢大會，泛民喺區議會補選單挑建制派，近年較為少見，所謂敵人嘅敵人就係朋友，唔少喺立法會杯葛拉布四子嘅泛民政黨都派代表撐場。面對泛民罕有群起而攻，傑仔尋日就選擇唔現身拉票。
長毛尋日喺坪石邨舉行造勢大會，陳志全（慢必）議會內外都咁撐長毛，仲自爆拉布期間不停要求點人數，就係希望「點到流會就可以畀長毛落區（拉票）」，為咗落區而博流會似乎有啲倒米喎！郭家麒就重提傑仔企圖「世襲」爸爸議席，呼籲邨民喺大是大非面前要認清自己企邊面。
反觀傑仔，除咗尋日朝早獲新民黨葉劉淑儀幫手派傳單，其餘時間全程「潛水」，對於世襲指控，亦只係透過選舉經理洪錦絃反駁，係泛民炒作舊聞，仲話傑仔選前一星期都要積極備選，冇咩事都唔會接受傳媒訪問。傑仔唔見傳媒可能係策略，唔好連市民都唔見就諗住贏梗就得嘞。