政情：「貪要付出代價」 法師捧喝曾湯
聞名國際嘅高僧一行禪師，上星期率領九十人龐大僧團，嚟香港展開為期兩星期嘅一系列「正念修習」活動，希望港人放低執念，放鬆自己活在當下。追隨一行禪師近卅年嘅香港梅村負責人法欽法師話，香港人壓力好大，全因好多人唔識畀自己心靈休息，畢生追求名利，但至死都唔知快樂為何物。當佢聽聞本港政府接連出現貪腐醜聞後，就苦口婆心咁勸告所有畀貪念沖昏頭腦嘅人：「『貪』會為部分人帶來好處，但亦有代價。就算一個人幾有錢，都只係同普通人一樣，每晚瞓一張床、每日食三餐。我希望有貪念嘅人，不妨慢行靜思，諗清楚點樣先能令佢哋最快樂。」唔知呢番大道理，會唔會令貪曾同貪湯有當頭棒喝嘅感覺，早日回頭是岸、返璞歸真呢？
當局與示威者要理性溝通
來自越南嘅法欽法師嚟咗香港七年，對於本港政治雖然唔太了解，但見到社會近年不斷出現大型示威、又發起「佔領中環」等對抗政府嘅行動。
佢認為道理其實好簡單，正如仔女有時會反叛，都係因為覺得父母唔肯聽自己講嘢，示威亦係人民對政府不滿嘅象徵，只要當局願意為公眾提供發聲平台，示威人士理性冷靜咁表達訴求，雙方心平氣和咁溝通就一定可以達成共識。
一行禪師嘅僧團入面仲有兩位港人法師修嚴同士嚴。修嚴法師以前係基督徒，喺一間銀行做會議統籌經理，以前嘅佢事業心重，老闆都好賞識佢，工作雖然一帆風順，但對行內勾心鬥角、互相利用嘅行為愈來愈覺得厭倦，幾年前聽咗禪師講道後，跟隨僧團做義工，體驗到「施比受更有福」嘅道理，○九年終於正式出家。
另一位士嚴法師出家前任職財務策劃公司，佢話每日見到客人想計劃嘅人生都好似倒模咁，連已婚人士都要睇自己夠唔夠錢先決定生小朋友，又見到好多有錢有地位嘅成功人士，工作忙到連飯都唔食，生活根本唔快樂，終於決定洗盡鉛華出家跟隨一行禪師。佢承認，香港人做嘢急速，放工放假都掛住撳電話或周圍消費購物，壓力只會愈積愈大，希望港人能夠慢落嚟，學習悠然自得咁活在當下。
其實貪字得個貧早有古訓。法欽法師話貪要付出代價，貪曾同貪湯依家明白晒啦。