中環出更：姚君偉轉賣中價袋吸客
香港嘅名錶、美鑽、靚袋，一向深受內地個人遊旅客嘅青睞。但自從內地經濟增長放緩，加上中央嚴打貪腐，香港唔少高價貨品嘅生意都大受影響。以售賣二手高級名牌袋起家嘅米蘭站，都要諗計仔迎合消費者嘅口味。卓妮日前遇到米蘭站執行董事兼董事總經理姚君偉（Gary），佢坦言，奢侈品銷情確有下跌，為咗刺激生意額，公司嚟緊會轉以銷售中價路線貨品為主，貴價袋就盡量入少啲貨。
高價貨銷情跌 蝕逾千萬
Gary日前同少有露面嘅胞妹姚秀慧（Cherie）齊現身一個公開場合，Cherie都係公司董事之一，但主要管理內地業務，所以較少留喺香港。Gary話，由於近月消費者意欲減退，去年公司由盈轉虧，蝕咗一千三百幾萬元。Gary直言，今年五一黃金周嘅銷情明顯轉弱，所以公司現正致力開拓中價市場，佢早前就親身飛往意大利，搜羅幾個中價手袋品牌引進本港，價錢將定位由三千至五千元左右，期望能以價廉物美嘅優點吸客。
卓妮