中環出更：籲提名選傑青 黃真真拍「默片」
傑出青年畀大家嘅印象可能太過傑出，似乎同一般市民拉唔上關係。新一屆十大傑青選舉尋日接受提名，大會邀請咗傑青之一、靚女導演黃真真搞搞新意思，拉埋新進導演盧秋彭製作咗一套「默片」，由舞台演員泰臣反串歷屆女傑青張天愛、陳英凝以及正生書院校長陳兆焯，訴說每位傑青嘅奮鬥故事，鼓勵大家主動提名身邊人參選。
肥亨恨抱孫出晒面
前商務及經濟發展局局長馬時亨（Fred）今年繼續為選舉擔任首席評審，尋日都有出席儀式。當大會要求Fred同一眾主禮嘉賓與一班小朋友影大合照嘅時候，幾位嘉賓一致望向大會攝影師鏡頭，唯獨Fred唔係好合作，不停左望右望，對住兩旁可愛嘅小朋友流晒口水。事後卓妮問佢係咪恨抱孫？Fred笑笑口咁話：「係呀，人哋食橙鍾意食甜橙，我就鍾意食酸（孫）嘅！」但佢話暫時未有喜訊公布。唔知佢兩個女露明同露玲聽到爸爸咁講，會否加倍努力造人呢？而露玲喺今年十月就會出嫁。
年輕人勿輕易轉工
本身都係傑青嘅洪為民（Witman）同龐愛蘭（Scarlett）都有現身支持活動。講到時下青年創業難，Witman坦言，以前佢嗰代稍為肯讀書，唔太懶惰，畢業後工作十年，就會「自然中產」。但依家經濟增長放緩，青年向上流動嘅機會確係細咗。但佢話機會少唔等於冇，建議年輕人培養耐性、唔好輕易轉工，做得好一定會有人賞識喎。
卓妮