廉潔廉潔，如果為官不廉，即係為官不正，為官不仁，必定成為千夫所指。嗱，前廉政專員湯顯明就係人辦嘞，揮霍無度，豪飲豪食，搞到廉署烏煙瘴氣，醜聞百出，連金漆招牌都蒙污。
根據廉署提交立法會嘅機密文件，自從貪湯○七年七月入主之後，廉署總開支就好似火箭咁極速飆升，直到貪湯舊年六月底離任時，每年開支已高達八億六千萬元，比起十年前嘅七億元大幅上升兩成三。最可疑嘅係，喺貪湯主政之下，廉署嘅宣傳工作開支不斷攀升，舊年升到一千六百萬元，比十年前勁升六成九！
廉署查案有迹可尋，但係宣傳工作開支突然急升，來無蹤，去無影，令人諗極都唔明。究竟宣傳乜嘢要使咁多錢呢？係宣傳廉署大花筒，定係宣傳廉署無王管？咪話功夫茶踢爆吖，宣傳工作開支飆升，可能就係貪湯公費吃喝開支飆升嘅結果。呢，審計署早前踢爆，貪湯曾經以宴客為名，大吃大喝，食爆酬酢開支上限之後，居然將呢筆不廉混帳當宣傳費入帳，依家機密文件揭露廉署宣傳工作開支急升，證明類似醜行多不勝數，曝光嘅可能只係冰山一角嘅咋。
講來講去，都係貪湯其身不正，將香港嘅廉政同法治搞到一塌糊塗。話時話，貪湯嘅貪腐醜行愈揭愈多，愈爆愈臭，何止將廉政公署變不廉公署，仲將廉署變酒莊添。廉署文件披露，貪湯任內除咗瘋狂遊埠、瘋狂送禮、瘋狂收禮之外，更加瘋狂買酒，五年間先後買入三百八十支酒，其中約七十支為茅台同干邑等名貴烈酒，涉及公帑數以十萬元計。你話嘞，貪湯入廉署究竟係返工定係飲酒吖？
仲有呀，貪湯除咗沉醉於美酒，亦鍾情外訪遊埠。佢一○年藉詞到四川視察震災援建項目，其實係假考察，真觀光，四日行程玩足三日，又遊九寨溝，又遊峨眉山，又遊樂山大佛，真係佛都有火。內地貪官橫行，以三公消費聞名國際，家陣貪湯有樣學樣，將內地貪風引入香港，相信唔使五十年不變，香港同內地好快就可以融為一體，一國兩制可以提早收檔咯！
古人話，愛財曰貪，愛食曰婪。貪湯既愛財又愛食，貪婪兩個字當之無愧。講到呢度，大家應該明白點解貪湯執掌廉署期間，查前特首曾蔭權爵士嘅貪腐醜聞查到無晒下文啦，一個貪官又點會檢舉另一個貪官吖，何況佢仲被視為貪曾嘅愛將添！
一句講晒，廉署變不廉公署，貪湯成為千古罪人。嗱，貪湯今日上立法會接受公審，咪話功夫茶唔提醒，保皇黨千祈咪再保奸護貪呀，如果唔係，你哋都會淪為千古罪人嘅咋！