保安局局長黎棟國日前就有關今年首季強姦案勁升六成，呼籲少女勿飲太多酒的言論招致狠批；一語激起千重浪，黎局長嘅言論，不單引起本地政客、關注婦女團體、女權主義者的圍插，並在國際媒體引起關注。
黎棟國呼籲少女勿飲太多酒以免招致性侵有錯嗎？他的話是否「一言興邦，一言喪邦」？若從正面解讀，黎局長的話並沒有錯，一如警方呼籲市民做好防盜措施，出外鎖好門戶窗門、離開座駕關好車窗、在公共地方貴重物品咪亂放等等，以防止賊人有機可乘，這有錯嗎？事實上，「吾家有女初長成」，做父母的一樣會用關心嘅口脗叫佢衣着端莊些，咪亂咁飲三唔識七嘅男士畀嘅飲品，外國有些開明嘅家長，媽咪甚至提醒女兒要做好安全措施，畀埋避孕套個女添；所以話，黎局長嘅「飲酒防失身」只係唔應該選擇喺公共場合講！
之不過咁，老朽從正面去睇黎局長，佢一時情急，視民之女如己之女而已；《論語‧憲問》子曰：「愛之，能勿勞乎？忠焉，能勿誨乎？」據學者李零解釋「忠焉，能勿誨乎」的「忠焉」是為人盡心，「誨」在這裏應讀「謀」，不是教誨之意而是謀慮之意，為人着想、出主意。
是以黎局長之言論是否如女權主義者指摘佢「本末倒置」，必要堅持「我的身體我作主」，令到黎局長「覺得很不安樂」，老朽亦只好以「見仁見智」看黎局長的飲酒論。
講到飲酒防失身，不禁使人聯想起貪湯，佢任內五年豪飲豪食，尤其愛以公帑豪買烈酒；若然「酒後易失身」，老朽更相信「酒後更易失言」，身為廉署一哥，知道好多秘密檔案，如果貪湯飲多兩杯，當正自己係咸陽少年遊俠，「相逢意氣為君飲」，一時酒後吐真言或者酒後失言，一些唔應該講嘅嘢隨酒氣噴晒出來畀啲唔應該知嘅人知，咁就更大鑊矣！