政情：區會玩併吞
政府日前向立法會提交文件，建議按人口增長喺下屆區議會選舉合共增加十九個民選議席。其實今次政府嘅計算方法已較過往鬆手，以十八區區議會每區人口計算，而唔係用全港成條大數計算，變相可增加多幾個議席。但由於最後仍僅得九個區議會有議席進帳，其餘一半都冇份，再加上政府由下屆開始全面取消區議會委任制，一次令六十八位委任區議員無得撈，所有多個區都要求上訴。由於整體增加十九席嘅決定估計難以推翻，有部分區議會就轉為向隔籬區打主意，希望吞咗對方嘅選區或議席，睇嚟負責有關問題嘅政制及內地事務局局長譚志源實有排頭痕。
離島葵青冇份 想分杯羹
今次只有九個區議會獲建議增加議席，即使有另外九個區失望而回，其中人口一向相對較少、分布又好唔平均嘅離島區，就大呻單純按整區人口計算對佢哋唔公平。以大嶼山區為例，即使扣除咗東涌同愉景灣等，整個選區仍有成個香港島咁大，一位議員無可能做得晒，加上東涌北不斷有新住宅入伙，預計該區人口到二○一六年會增加約二萬人，要求當局起碼要加多一個議席。
同樣冇份加議席嘅葵青區就話，佢哋人口超過五十一萬，按政府一萬七千多人有一名區議員嘅基數計，四捨五入應該有三十席，即使最少增加一席先啱，反而目前議席最多、但人口不斷減少嘅東區就唔使減議席，認為政府做法好唔合理。
黃大仙九龍城 爭啟德區
至於黃大仙區，就對隔籬嘅九龍城區獲增加兩席深表不滿，認為過往因舊機場關係而屬於九龍城嘅啟德新發展區，裏面嘅居民其實同黃大仙區關係仲密切啲，該兩席應歸佢哋所有。但九龍城區就堅持啟德一向都歸佢哋管，冇理由無喇喇要割咗畀黃大仙區。
即使係有得加議席嘅區議會，都對政府安排有微言。其中獲建議增加兩席嘅沙田區議會，認為要一次過加三席畀佢哋先夠，因為該區一向分開做大圍、沙田市中心及馬鞍山三區，各區近年都有人口增長，只加兩個議席嘅話，都唔知分畀邊區先啱。有人就向獲建議增加兩席嘅油尖旺區打主意，因為據聞該區唔少現任區議員，都擔心當局因應加議席而重劃選區後，會將佢哋服務開嘅選區同票源斬到亂晒龍，隨時益咗選舉對手，認為可能唔加好過加，一切維持現狀仲安樂啲喎。