中環出更：鄧宣宏雁雲南同鄉會尋根
中國人重鄉情，各省市旅港同鄉會多到數唔晒。來自雲南嘅太子珠寶鐘錶執董鄧宣宏雁（Emily），最近亦加入雲南旅港同鄉會，並且出任名譽會長。Emily笑笑口話，佢嚟咗香港十一年，一直埋頭相夫教子，兩年前至出番嚟做嘢，亦唔為意要喺香港搵鄉里，直至有日好友愛沙尼亞共和國駐港名譽領事林建康提起，佢至認真尋根，終於順利「回歸」。
將赴美睇二公子畢業
Emily好雀躍話，加入同鄉會後先知，香港竟然有超過四萬名雲南籍人士，見到同聲同氣嘅鄉里，開心到極，好多仲係幫襯佢公司廿幾年嘅熟客，包括知名嘅伍氏家族，以後可以多啲促進雲港兩地嘅交流。
近期鐘錶市道吹淡風，但Emily公司仍然按部就班開新舖，公司員工忙到不得了。不過，Emily報喜話，鄧家二公子Arthur即將畢業返港，屆時就多一名「太子」返公司幫手喇！今次畢業禮原本同公司贊助嘅精英盃賽馬日撞期，但佢同老公鄧鉅明面對兩難抉擇，原已決定選擇去美國為囝囝打氣，估唔到馬會因賽事安排臨時延後一個星期舉行盃賽，主人家終於可以趕返港招呼賓客，難怪Emily開心歡呼：「天助我也」！
卓妮