問大家一個問題，五毫子可以買乜嘢？諗唔到呢，等功夫茶開估喇，今時今日五毫子淨係可以買個膠袋咋。即係話，喺呢個百物騰貴嘅年代，五毫子根本微不足道，但奇怪嘅係，有人偏偏為咗微不足道嘅五毫子勞師動眾，搞到告上法庭，問你服未。
件事係咁嘅。一名的士司機舊年接載一名女乘客，咪錶顯示車資一百三十六點五元，佢收取一百三十七元，即係收多咗五毫子，本來係好平常嘅事，點知該女乘客向警方投訴，結果司機被控濫收車資。好彩尋日開庭時，控方決定不提證供起訴，司機總算大步檻過。喂，五毫子咋，使唔使小題大做吖？咁都要告上法庭，係咪浪費社會資源吖？
雖然的士司機最後冇事啫，但正如佢話齋，案件擾攘半年，搞到身心俱疲，法律程序對佢唔公平，希望當局交代當初控告佢嘅原因。冇錯喇，話就話濫收車資，但究竟檢控嘅準則係乜，撤銷控罪嘅準則又係乜，當局似乎仲欠一個交代喎。試諗吓，如果連呢啲雞毛蒜皮小事都要檢控，法庭咪好唔得閒？
講起小題大做，今次已經唔係第一次o架喇。早前有位菲傭被指買豬肉時「打斧頭」十五元，僱主報警鬧上法庭，結果法官直斥案件荒謬，更質問警方點解唔以較輕嘅自簽守行為方式處理案件，「難道警察沒有其他事可做」？
怪事年年有，今年特別多，有人為咗十五元報警，有人為咗五毫子告人，真係無奇不有。即係咁，香港係法治社會，依法辦事本來係冇錯o架，問題係，如果郁吓就報警，郁吓就鬧上法庭，小事化大，上綱上線，咁就永無寧日嘅喇。嗱，為咗區區五毫子，警方要勞師動眾調查，律政司要提出檢控，法庭更加要排期聆訊，到頭來咪又係浪費納稅人金錢，條數又點計先？咁又算唔算濫用司法程序呢？講到底，法律不外乎人情嘅啫，為咗五毫子而訴諸法庭，唔只係笑話，根本就係九唔搭八，如果警方得閒冇嘢做，不如去打擊嗰啲真係濫收車資嘅無良司機好過喇。
所以話，國之將亡，必有妖孽。香港時運差，政治爭拗多，牛鬼蛇神更多，有人一味無事生非，一時報警，一時投訴，一時司法覆核，簡直唯恐天下不亂。而最荒謬嘅係，有啲衙門例如警方及平機會咁，不分是非，不理對錯，一接到投訴就亂咁檢控，結果搞到永無寧日，令無辜市民備受滋擾，不勝其煩。嗱，多收五毫子車資都可以成為檢控嘅理由，咁涉及連串貪腐醜聞嘅貪曾同貪湯就更加走唔甩喇，係咪！