有同監警會啲成員相熟嘅人士透露，委員會平時遇到嘅投訴人，唔少人真係好有特色。曾經有成員遇過一名投訴者一入到會議室就除衫，呢位仁兄仲問在場嘅成員及警員，話自己係咪好大隻，跟住佢仲連褲都除埋，再叫在場人士估吓佢嗰日有冇游水。當然乜嘢料都未收，第一件事就係叫投訴人着番晒啲衫褲至講。
退休警「玩嘢」播幾日錄音
更難搞嘅原來係退休警員，由於佢哋熟悉《警隊條例》，處理佢哋嘅投訴就更加要打醒十二分精神。話說有關投訴人投訴時，因為覺得自己唔夠受尊重，「玩嘢」要求成員及警員聽佢播放長達幾日嘅錄音帶，話係投訴證供喎，所以大家咪逼住要聽囉。就算成員有事，都要同呢位前阿Sir「請假」先至可以外出，真係尊重晒佢囉。