政府尋日刊登憲報宣布曾德成會喺下周四開始放假，直至下月十一日為止，前後一共二十日假期，期間會由民政事務局副局長許曉暉署任，印象中曾德成係新政府上任十個月來，一次過放最長假嘅問責官員，即時惹出各方揣測呢次休假並不尋常，甚至有陰謀論話可能係別有內情。
許曉暉將署任搶先放假
不過有官場中人大派「定心丸」話，曾德成呢次只係正常放假，唔需要有不必要嘅猜測，更加絕對同身體健康無關喎，因為曾德成尋日都仲同緊十八區區議會主席見面，亦有持續落區聽取地區人士意見。
至於即將展開長達廿日署任局長生涯嘅許曉暉，聽聞近日搶先喺德成局長前放幾日假，相信係為之後一鼓作氣做好署任工作有關啦。