政情：潘國山交論文證清白
約兩個月前喺沙田區議會田心選區補選中，以高票數當選嘅公民力量（公記）潘國山，前年區議會選舉前夕稱因要專心做博士畢業論文，故放棄參選。當時有唔少人都話佢因為要讓個議席畀有份創辦公記嘅劉江華先唔選，但劉江華最終因為入政府做官，辭掉區議員職務，需要進行補選，雖然潘國山參加補選並贏得議席，但整件事就成為咗人哋嘅話柄，批評佢欺騙選民，又話佢將選民「用完即棄」。
鍾意讀書 又愛飲茶
不過，潘國山呢兩個月力證自己並冇欺騙選民，事關佢真係有寫論文，而且仲就快畢業添。佢話，如無意外會喺六月尾畢業，至於論文嘅內容呢？就等順利畢業之後先講喎。不過，原來佢除咗鍾意讀書外，仲對茶道有啲認識，佢話自己鍾意飲茶，但平時飲啲茶都好平，一百元就有一大餅，可以飲足一個月。咁會唔會一邊飲茶一邊做論文呢？佢就笑住咁話，呢啲只係小說入面先會有喎。