政情：葉國謙助蔡菜子伐樹除根
港府早前建議二○一五年民選區議會議席數目增加十九席，其中灣仔區議會非但冇議席增加，並因取消委任議員令區議員數目銳減至只有十一席，因而傳出重新劃區嘅消息，即係將東區部分議席轉移畀灣仔區，旨在為免灣仔區會人數太少難以運作。據聞政府暫時未有取態，或多或少同喺港島區最有「牙力」嘅民建聯（民記）內訌有關，當中牽涉民記兩大陣營嘅多角關係！
鍾只肯分四席畀灣仔
政府早前放風有意將東區部分議席轉移畀灣仔區，即時觸動民記中人神經，更令民記內部分成兩大陣營。消息指，「雙料議員」鍾樹根同民記東區支部認為最好區界維持不變，如果要變最多都係分四席畀灣仔，分別係維園、天后、炮台山同城市花園，唔想勢力被削弱。不過，聽聞以北角為根據地嘅蔡素玉（蔡菜子）私底下不滿北角被打散，要劃應該將整個北角併入灣仔。
正當兩大陣營角力之際，估唔到區議會界別議員葉國謙突然加入戰團，除咗支持蔡菜子將北角區併入灣仔區外，仲提出新建議話不如將灣仔區同中西區合併喎。據聞樹根之所以同意割讓四區入灣仔，其中一個原因係佢友好維園區議員周潔冰可順利轉至灣仔區，周潔冰或有力問鼎灣仔區議會主席，屆時兩人就可以拍住上，擴大勢力。正因為咁，有人唔想樹根坐大，所以支持蔡菜子將北角區併入灣仔區。
面對民記內部意見亂過亂世佳人，暫時未有讓步嘅迹象，據聞政府內部都唔急於喺呢兩、三個月內做決定，因此尋日有份同十八區區會正副主席見面嘅政制及內地事務局局長譚志源，講及劃界一事口風都好鬆動，佢話有意見認為灣仔同中西區合併，有意見認為東區應將部分選區劃畀灣仔，另有意見唔同意咁做，認為會影響東區校網同康樂設施，再三重申依家當局係持開放態度。
譚志源或做「和事老」
不過，話說回頭，譚志源遲早都要有個說法，有人建議佢搵晒樹根、葉國謙同蔡菜子三人，舉行一次「三方會面」，三口六面拆掂佢，呢個先係治標又治本嘅方法，認真信不信由你喇。