中環出更：大獻琴技李煥明行善過足癮
IT界才女、Autodesk港澳區區域總監李煥明（Wendy），對電腦及科技產品固然熟悉，但佢入行之前，其實百足咁多爪，除咗兼職電視台嘅天氣小姐之外，仲做過音樂製作人，後來仲入埋香港菁英會添！嚟緊佢會參與沙士十周年嘅籌款活動，客串彈奏電子琴，過吓手癮兼為慈善出分力。
仍未生疏 不時演出
Wendy話，佢自小已經喺校內合唱團負責鋼琴演奏，亦有參與舞台劇嘅演出。雖然佢依家踏入社會，但十隻手指從未生疏，仍不時參與唔同慈善音樂會嘅演出。去年立法會選舉，佢就同老友、互聯網專業協會（iProA）會長洪為民合作，為IT業界作咗首主題曲，幫參選嘅譚偉豪做宣傳。
講到工作，Wendy話佢公司專門研發3D軟件產品，唔少紅爆全港嘅電影，所用嘅特技都係搵佢哋幫手。佢仲話，依家3D嘅用途愈來愈廣泛，小至一個美女洗髮水廣告，都滲入3D元素，未來會將技術應用於地產行業上，客人未裝修間屋，已可預先睇到裝修後嘅效果。
卓妮