中環出更：影冷熱婚照 黃進達顯心思
一向好客嘅馬會大董葉澍堃（Stephen）早前邀請一班後生仔入馬場食飯，出席嘅有香港青聯賢慧社主席羅詠詩、菁英幗聚主席林玉茵、華明行副總裁高偉國、萬通集團董事羅啟邦等人。不過，要數最特別嘉賓，會係康泰旅行社總經理黃進達（Jason），事關佢罕有帶埋極少曝光嘅未婚妻陳婷婷（Tania）現身，仲講起將於九月拉埋天窗。據講佢哋籌備婚禮隆重其事，連婚紗相都影一冷一熱兩款，認真有心思。
去齊泰韓 與妻各取所需
Jason話，九月將喺灣仔會展大排筵席，迎娶任職投資銀行嘅女友Tania。黃家相識滿天下，閒閒地要擺一百圍至搞得掂。Jason坦言都想大搞，希望到時可以盡量擺到百圍喇！為咗籌備婚禮，佢哋由年初就馬不停蹄奔波，包括去韓國及泰國分別影咗一冷一熱嘅婚紗相。點解咁有創意？原來Tania鍾意韓國，但係Jason就喜歡陽光與海灘，所以咪大家辛苦啲，去晒兩個國家囉！
未來黃太就透露，兩人喺中學時期參加校外活動相識，愛情長跑已經八年。卓妮八卦問佢哋求婚過程係點，Jason笑稱係未婚妻向佢求婚喎，難得Tania聽罷冇唔高興，仲話一餐飯就已經搞掂。兩人一唱一和咁合拍，印證乜嘢叫做「夫唱婦隨」嘞。
Jason忙住打理生意兼籌備人生大事，另一邊廂，已經退休嘅Jason爸爸黃士心就翹埋雙手，他他條條等飲新抱茶。日前卓妮就見到佢喺金鐘出現，同行仲有一大班新加坡朋友，原來佢哋啱啱飲完茶，黃士心盛讚阿仔做得唔錯，自己可以真正放手過退休生活喇！
卓妮