金句多籮籮嘅前政務司司長唐英年曾經講過，僭建就係僭建，違規就係違規。言下之意係，犯法就有必要嚴肅處理，唔可以敷衍塞責當冇事發生，正如古人話齋，天子犯法與庶民同罪吖嘛，理得你違規者是否權貴。
不過有一件事係非常之咁令人痛心疾首嘅，特區政府嘅執法能力一向偏低，即使官老爺明知有人犯法，都未必會第一時間處理，往往一拖再拖三拖四拖，拖得十年八載問題依舊。莫講話感情缺失嘅唐唐涉及僭建啦，全香港唔知幾多業主違規加建額外空間，長年累月都未依法取締。
好嘞，申訴專員公署繼一手捲起僭建風暴之後，家陣又發表調查報告揭發連串政府部門缺失，包括地政總署接獲投訴八年竟然懶懶閒，官僚作風十足十唐唐金句「吊吊揈」。申訴署嚴斥相關部門得過且過，執法過於寬鬆，容易畀人一個錯誤訊息，以為不優先處理等於永不處理。
件事係咁嘅，○五年開始有工業大廈嘅業主立案法團多次向地政總署投訴，有人利用工廈單位經營寵物殯儀服務，包括寵物屍體焚化、寵物骨灰龕場以及寵物骨灰加工等等，涉嫌違反土地契約所訂嘅土地用途限制。法團多次投訴之後，地政總署仍然冇採取有效行動，違規問題一年復一年持續落去。長期不得要領嘅業主立案法團忍無可忍，終於喺去年六月向申訴專員公署投訴。
申訴專員經過查找真相之後證實，地政總署雖然有實地調查並且徵詢法律意見，但係除咗多番發出毫無法律約束力嘅警告信之外，完全冇實際執行土地契約條款行動，連「釘契」咁簡單嘅事都係申訴專員公署介入之後先至做。官僚該管唔管，花開花落春去秋來都唔做嘢吖嘛，違規單位犯法得變本加厲，單位數目由初期嘅兩個增加至後期七個涉及違規單位。
簡單咁講，地政總署官僚疏懶八年冇執法，嚴重辜負法治之區嘅金漆招牌。
喂，寵物殯儀服務牽涉容易腐爛嘅屍體，一個唔覺意孳生細菌，喺今時今日禽流感同新沙士兵臨城下嘅環境裏面，點可以容許工業大廈違規燒屍o架？萬一寵物殯儀服務成為傳染病嘅幕後黑手，邊個承擔瘟疫蔓延嘅滔天大罪呀？除咗衞生問題唔可以忽視之外，違規燒屍亦有可能構成消防隱患，一失火成千古恨唔講得笑o架！
之但係話分兩頭，寵物殯儀服務係有市場需求o架，貓貓狗狗壽終正寢冇理由隨手抌落鹹水海啫。即係咁，唔該特區政府好好規劃又好好規管，將寵物殯儀服務納入正軌，以符合衞生同消防嘅方式經營，等主人心愛嘅寵物一路好走。