新民黨荃灣委任區議員趙公梃早前突然請辭，之前盛傳新民黨副主席鄭承隆諗住坐定粒六「替補」趙公梃，不過據聞呢個消息一出後令到地區好大反彈，直言政府唔應該畀鄭「世襲」委任議席，自此鄭獲委任嘅行情大跌。最新消息有傳，呢個委任議席將會係無乜政黨色彩嘅香港工商總會荃灣分會主席陳世光同仁濟總理朱德榮二人之爭喎。
有地區消息指，荃灣委任區議員、新界社團聯會副理事長陶桂英近日發功向民政事務局局長曾德成推薦陳世光，接替趙公梃嘅委任議席空缺。消息形容，陳世光係「老荃灣」，又話陶咁有把握陳可以做佢區會同僚，係因為佢同曾德成認識多時，信不信由你。
不過，另有地區人士透露，曾於○七年獲委任為荃灣區議員嘅朱德榮，有傳亦有一定機會接替呢個空缺，主因係佢家族一直扎根荃灣服務，加上之前曾獲委任，相信較為地區人士接受。至於朱德榮前年為何未再獲委任為區議員，消息指或同政府減少委任議席有關。究竟最終邊個會跑出，相信邊個惹來地區最少反響係關鍵！