政情：吳得掂開會睇股赫見自己「罪證」
尋日立法會特首答問大會無火花，搞到多名官員悶到要玩手機消磨，就連中央政策組首席顧問邵善波同行政會議召集人林煥光都要閉目養神釣吓魚。不過，講到最識得善用時間，就要數到用手機上網睇股票嘅教育局局長吳克儉（吳得掂）嘞！
話說特首答問大會期間，網上忽然瘋傳一幅吳得掂睇緊Bloomberg手機程式嘅相片，正當網民鬧爆吳得掂炒股之際，原來呢張相亦瘋傳到吳得掂嘅手機。吳得掂驚覺睇股市被撞破，不時用手半掩電話，但坐喺佢隔籬嘅政制及內地事務局局長譚志源就一於少理，疑似繼續玩「水果忍者」遊戲，表演獨指神功，生果鎅不停。
保安局局長黎棟國及後亦加入「掃mon」兵團，但至醒都係發展局局長陳茂波，因為佢尋日冇去到答問大會。吳得掂會後被追問股市行情，但佢就狀甚無辜咁話，尋日早咗十五分鐘到會議廳，仲話自己不時都會更新一下最新嘅消息，包括財經消息。咁留意財經消息，唔知吳得掂又有咩炒股心得呢？教育局發言人就話，局長幾年以來都無買賣過股票喎。