政情：林健鋒派膠「死Duck」 谷商機唔多吉利
一隻空心吹氣巨型膠鴨，受到唔少市民追捧，令死氣沉沉嘅香港有番少少生氣。香港總商會主席周松崗話，咁啱總商會有理事都係膠鴨製造商，既然市民咁鍾意膠鴨，明年總商會搞周年慶祝活動時，可能會考慮吓用膠鴨做賣點，實行「全民賞膠」。適逢今年係總商會第一百二十五周年「生日」，所以本月廿九日會請全港市民免費搭電車同天星小輪，預計有三十萬人受惠。
雖然周松崗冇講邊位理事專做膠鴨，但好多人都知總商會立法會代表林健鋒（Jeffrey）爸爸林亮，正正係本地「膠鴨之父」，當年靠生產膠鴨起家。Jeffrey眼見潮流興膠鴨，尋日即時喺立法會周圍派玩具膠鴨，班議員亦好樂意接受，工程界盧偉國就話自己個孫晚晚都要膠鴨仔陪伴沖涼，而鄉議局劉皇發仲擺埋隻膠鴨上枱，叫政府諗啲類似低成本、高效益嘅商機。
不過，Jeffrey派嘅膠鴨形態同依家維港嗰隻巨鴨好唔同，有人形容隻膠鴨雙眼半反白，好聽啲就係向上(目及)緊嘢，唔好聽就十足死鴨咁，名副其實係「死Duck」，係咪要執吓對鴨眼嘅顏色好啲呢？