政情：肥佬黎李漢奸 密會西人搞「大計」？
被喻為「搞事四人幫」嘅壹傳媒肥佬黎同「李漢奸」民主黨創黨主席李柱銘，每逢香港有重大事情發生，都會飯局密會，好似最近討論政改風頭火勢，佢哋食飯就更加緊密嘞。話口未完，尋日傍晚我哋又見李漢奸揸車去肥佬黎嘅加多利山寓所食飯密會。不過今次並冇「民主阿婆」陳方安生參與，反而換來一對男女，其中男嘅係一名西人，唔知道佢哋又喺度密謀搞乜嘢「大計」呢？
一反常態 唔飲早茶
肥佬黎尋日一反常態，晨早冇去中環陸羽茶室飲茶，反而走咗去中環德成大廈，即係佢成日去做舌針治療嗰度。肥佬黎逗留約二十分鐘，就坐座駕返屋企。期間，肥佬黎喺屋企見過兩個疑似係佢員工嘅人。直至下午一時，佢再坐座駕返公司開會，至下午約四時離開。直到五時四十分，我哋見到兩名分別約五十多歲嘅西人男士及華人女士坐的士去到肥佬黎屋企，佢哋仲刻意避開我哋嘅視線，側面咁行入屋。
到六時許，我哋再見到李漢奸夫婦駕車抵達肥佬黎屋企，然後入屋。佢哋一直食到晚上約九時先至散場，幾個人乘坐李漢奸架車離開，當中嗰位西人男士仲坐喺前座，同李漢奸有傾有講添！其實肥佬黎同李漢奸上個月先見完，今個月又見，使唔使咁癡纏呀？話佢哋唔係搞「大計」真係冇人信囉！