政情：暗撐拉布泛民撻到攤攤腰
立法會財政預算案「拉布」戰持續，令全港公務員隨時無糧出，全港貧困家庭同長者面臨無綜援、無生果金同無電費補貼攞嘅「三無」危機。最新一項有關立法會議員民望嘅民調顯示，泛民主派嘅整體支持度出現暴瀉，而且跌得最多嘅唔係發動拉布嘅社民連同人民力量，反而係聲稱唔支持拉布、但實際上暗撐拉布嘅公民黨、民主黨同工黨。唔知呢班所謂講民主嘅主流泛民黨派，會唔會順應民意，齊心剪布？
香港研究協會喺上月三十日至五月七日，即預算案拉布戰開打期間，成功訪問咗一千一百六十七名市民，問吓佢哋對三十五名直選議員同五名超級議員嘅評分。結果廿一名泛民議員（唔計傳統功能界別議員）當中，有十五人評分下跌，僅六人上升。而十九名建制派議員當中，則有十二人評分上升，只得七人下跌，反映泛民嘅拉布行為不得民心，變相益咗對手，所以拉布都為建制派議員帶來些少好處。
發動拉布嘅四名泛民議員梁國雄、黃毓民、陳偉業同陳志全，評分一如所料全線下跌，但跌幅相對輕微，反映拉布對佢哋嘅影響有限。反觀標榜中產專業嘅公民黨梁家傑同陳家洛、標榜溫和理性嘅民主黨胡志偉、何俊仁同單仲偕，以及標榜勞工基層嘅工黨李卓人同何秀蘭，評分就顯著大跌。其中梁家傑、陳家洛同李卓人，更加係今次調查中跌得最多嘅三甲，估計係與兩黨對拉布立場表裏不一，以及李卓人喺碼頭工潮中嘅表現有關。
反拉布議員多獲加分
建制派方面，今次升得最多嘅係立法會主席曾鈺成，但佢到依家都未諗到計「剪布」，部分建制派更炮轟佢縱容拉布，拉布戰再拖落去，市民對曾主席嘅評價隨時逆轉。其他升得較多嘅，仲有大力反對拉布嘅工聯會王國興同麥美娟，民記梁志祥、鍾樹根、陳鑑林同李慧琼，以及新民黨田北辰同獨立謝偉俊等。不過，同樣反拉布嘅西九新動力梁美芬、民記譚耀宗同蔣麗芸，評分就逆市大跌，估計係涉及個人問題多啲。