中環出更：陳振彬「追星」向美女廚神偷師
港區全國人大代表陳振彬（Bunny），平時公務繁忙，所以一得閒就鍾意周圍捐窿捐罅搵好嘢食，仲會主動同身邊朋友分享心水美食。最近Bunny就獲老友仁濟醫院當年顧問郭小瑜（Galon）推介，一齊去中環蘇豪區一間奪得米芝蓮一星美譽嘅高級餐廳「TATE」試菜，同場仲有物業投資者李冠亮。
開業半年 米芝蓮摘星
餐廳主打創新法日菜，由年輕「美女廚神」兼餐廳老闆劉韻棋（Vicky）主理，喺佢用心經營下，去年餐廳開業短短半年，就輕易摘下一星。當晚Vicky親自招呼Bunny幾位貴賓，表演出神入化嘅廚藝，炮製出九道色香味俱全嘅佳餚，包括招牌菜鹿兒島牛柳配麵豉薯蓉、洋葱濃湯馬頭魚、法式鵝肝醬酥片等，每道菜都用上新鮮食材，最吸引係精緻嘅賣相，令人嘆為觀止。
Bunny等人品嘗美食後，都忍唔住要走入廚房向美女廚神偷師。Vicky話，由細到大都好鍾意下廚，縱使讀大學時主修設計，畢業後開辦設計公司，仍不時煮番幾味。後來佢專程走到泰國著名嘅藍帶廚藝學院Le Cordon Bleu進修，學成歸來後決定開設呢間餐廳，難怪出自佢對巧手嘅美食，碟碟都滲滿藝術元素喇。
卓妮