前任廉政專員湯顯明卸任十個多月後，涉及他的貪腐醜聞愈爆愈大鑊，豪花公帑送禮、外訪支出超勁、自批宴會、多次攜女友赴飯局、頻宴請中聯辦官員……
咁嘅廉政專員一哥一手摧毀「廉潔奉公」嘅香港核心價值，打擊香港近四十年建立嘅良好聲譽，港人──尤其是一向有規有矩嘅十多萬公務員，唔痛心兼悲憤就假。老朽早前看過內地一則趣事，話說氣象局出上聯：天有不測風雲，務請體諒；地震局對下聯：人有旦夕禍福，各自保重。老百姓看後不爽，給出橫批：要你何用！
貪曾禍港七年，親自挑選個如此「混帳」嘅貪湯，一對活寶貝，搞到香港原本廉潔嘅社會蒙上點點污迹，你話港人又點會爽，要啲咁嘅廢官何用？
「香港勝在有你同ICAC」！如果時光可以倒流，睇怕老朽在課堂上，好應該話畀啲小朋友知：「香港勝在有東方報業集團」！
講真，本報首揭貪曾「貪遍省港澳」醜聞，今貪湯濫用公帑醜聞始於今年二月，東方報業集團揭發他於一○年未經公開招聘，以近一百萬元年薪聘請內地學者袁柏順，擔任廉政研究中心合約顧問，連立法會亦被蒙在鼓裏；其後瘋狂外訪；公帑豪宴內地官員，國酒茅台飲到不亦樂乎！正所謂「掘出蘿蔔帶出泥」，劣行斑斑，臭史籮籮，經東方報業集團一再揭發，梗係引起社會廣泛關注啦！
梁振英話「必定嚴肅處理，維護社會對廉署的信心」，老朽希望佢係，四人獨立檢討委員會小組切勿如查貪曾咁，一味雷聲大，雨點小，一味高高舉起，輕輕放下！如果只係堵塞規管漏洞，而未能將瀆職高官繩之以法，則廉署反貪利器，其銹迹又點會清洗得甩啊！唔好畀老朽又估中，亂賊臣子懼，香港勝在有東方報業集團！