本港政治爭拗愈演愈烈，立法會一個小組委員會原本尋日就鐵路發展做諮詢，點知變咗建制派同泛民主派嘅戰場。話說幾個白鴿黨區議員輪流炮轟建制派支持南港島線分兩段興建，係出賣南區居民權益，亦拖延鐵路發展兼浪費公帑。同屬建制派嘅小組委員會主席陳鑑林（橄欖）聽見泛民連番攻擊，當堂黑晒面，叫團體表達意見就算，互相攻訐就唔係幾好嘞！
點知白鴿黨南區區議員柴文瀚即刻打斷橄欖發言，問佢班黨友係咪犯咗規程，點解唔可以攻擊其他團體，仲反問「我一陣攻擊民主黨得唔得？」
橄欖嬲到震，連喝兩次「唔該你收聲！」先至阻止到佢發言。之後王國興都好唔忿氣，話羅健熙借題發揮、翻炒舊資料，攻擊手法好低莊、卑劣，令會議氣氛相當火爆。
據了解，南港島線華富邨至西環嘅薄扶林段工程至今仲有爭拗，由於有泛民區議員唔接受高架橋方案，所以建制派為咗項目快啲推展，先至同意政府分階段興建，支持首先興建黃竹坑至華富邨一段，所以有建制派議員批評阻礙鐵路發展嘅係泛民，係泛民賊喊捉賊至真。