政情：拉布四子讓步偽術抗剪布
財政預算案能否喺本月中通過，一切要睇立法會主席曾鈺成幾時手起刀落狠狠「剪布」。不過，拉布四子尋日率先出招，提出喺日後會議減少點算法定人數，又話會減少發言次數，表面看似就拉布讓步，但人民力量陳偉業尋日就喺社交網站自爆，所謂讓步其實係令主席無理剪布。換句話即係假讓步，可以拖延至較後時間先至被剪布，睇嚟呢場拉布同剪布嘅攻防戰將繼續好戲連場。
泛民曖昧 被寸「間接拉布」
拉布戰停不了，曾鈺成尋日召集各黨派議員舉行閉門會議商討對策，據聞喺會上火藥味濃，首先拉布四子之一嘅「長毛」梁國雄擺明玩嘢要求用電話錄音，當然被曾鈺成阻止啦，之後三申五令唔准議員出外引述。建制派席間都有提出抗拉布嘅招數，不外乎係要求主席「剪布」同通宵開會，以睡魔消磨拉布四子嘅意志，連罕有就剪布發言嘅飲食界張宇人，亦事前張揚會支持曾鈺成任何決定喎。
泛民主派方面，雖然佢哋把口話唔支持拉布，但行動就最誠實，揚言亦不贊成「剪布」，其中公文袋議員更形容剪布係「核彈」，去年至今都冇用過，於是有人寸泛民呢個曖昧表現，其實同間接拉布冇乜分別喎。不過，要數最辣招，首推拉布四子釋出善意，由陳偉業代表宣布「讓步方案」，第一會減少點算法定人數，第二係就每項合併辯論盡量僅發言一、兩次。如果套用泛民用語，其實一切都係「魔鬼在細節」。
有人分析，拉布四子「讓步方案」呢招旨在減少主席以論點重複為由阻止發言，營造會議好似順利進行，到時主席一剪布就會成為醜人，把所有責任都推卸到主席身上，拉布四子則可以全身而退。不過，曾鈺成縱橫政壇多年都非泛泛之輩，尋日未有草率透露剪布方案，講到明會觀察多一段時間先決定點做，又引用外國「拉布」情況，呼籲政府同少數派溝通化解，究竟拉布同剪布陣營誰勝誰負，相信好快就會有分曉。