中環出更：黃英豪自爆半月賣兩噸金
早前金價暴跌引發搶金熱潮，遇着五一黃金周，黃金更加渴市。我哋日前喺沙田馬場遇到「新金王」金至尊集團主席黃英豪（Kennedy），雖然佢匹愛駒最終冇跑出，但依然笑到四萬咁口，皆因過去兩星期，其集團已售出近兩噸黃金，冇錯，係兩噸。銷情咁旺，想唔笑都幾難喇。粗略估計，如果以黃金現價每安士一千四百七十美元計算，兩噸黃金淨值已有八億幾港元，仲未計手工利潤喎。
話金價好快回穩
對於黃金現貨嚴重短缺，Kennedy建議大家可以預訂，但唔使驚之後冇金賣，事關黃金終歸都只係一種商品，唔會賣斷貨，極其量只係供不應求啫！佢仲話，金廠嘅工人已經日以繼夜、夜以繼日咁加班，過多兩星期，黃金自然就會鋪滿一地喎。佢相信，五一搶金熱潮過後，缺貨情況就會大大改善。金價今次短期內跌破一千三百幾美元，但近日已經反彈近一成，Kennedy相信好快會回穩至一千五百美元，短期內都唔會再跌。