中環出更：3400人齊玩數獨申健力士紀錄
「數獨」遊戲（Sudoku）風靡全球，啱晒數口精嘅香港人。城中一班官員同名人尋日就與逾三千四百名師生，齊齊玩「數獨」遊戲，申請打破健力士世界紀錄。為慶祝建校三十周年，仁濟醫院林百欣中學一班師生，尋日喺荃灣城門谷運動場擺下擂台陣，廣邀三十多間中小學及團體，一起玩「數獨」，遊戲咁益智，吸引該校校監劉坤銘、民政事務局副局長許曉暉（Florence）、葵青區議會主席方平等人捧場同挑戰。
曹宏威幫手正名「數多酷」
立法會議員田北辰就擔任紀錄見證人，拎住個秒錶負責計時；中文大學生物化學系客席教授曹宏威就拍心口做大會裁判，一眼關七。博學多才嘅曹教授，除咗講科學唔簡單外，估唔到佢文采都一流，幫「數獨」遊戲「正名」，改名做「數多酷」。何解呢？佢話係將日語「Sudoku」直接翻譯過來喎。個名譯得好唔好，就要大家畀吓分喇。
尋日成班參賽者都玩得好投入，比賽開始一刻，人人拎住一張「數獨」紙，埋頭埋腦填呀填。原來方平係首次玩，所以最後見佢張紙有幾個空格未填；而劉坤銘就喺賽前一晚先惡補。講到數獨老手，當然係許曉暉，原來佢平時用「數獨」嚟減壓嘅。不過，Florence就未畀兩個囡囡玩呢個遊戲，只係平時帶囡囡到街市買餸，一邊買餸一邊訓練佢哋用心算計數，活學活用。
對上一次最多人一齊玩「數獨」嘅世界紀錄，係由新加坡一間學校喺○八年創下，當時有一千七百人參加。今次香港有逾三千四百人共創佳績，相信可以打破世界紀錄。
卓妮