「游」然自Duck

粉絲凌晨三時排隊買精品

整日有逾千人慕名而來，盼一睹巨鴨正面風采之餘，亦望與露天廣場上列陣的廿四隻膠鴨零距離接觸。不少市民童心未泯，對膠鴨又摸又攬，甚至爬上鴨身拍照，卻苦了默默耕耘、負責清潔的海港城職員余先生，他不斷徘徊於眾鴨之中抹拭，「中間嗰堆鴨仔最多腳印同磨損，腳印仲可以抹得甩，但刮痕就救唔返。」因不欲打擾遊人雅興，他未有出言勸止遊人踩鴨，只默默隱身於人潮中工作，「大家都係想開開心心睇呢隻和平鴨，希望各位可以多啲公德心」。昨午因微雨關係，遊人騎鴨情況有所收斂。

主辦單位海港城續售限量版精品，當中最受熱搶的是共千隻限量版九厘米橡皮小鴨，每隻均印有藝術家簽名及紀念版編號。排頭九位的Kayla凌晨四點多通宵守候，「第一日早上九點幾黎到都已經派晒籌，惟有今次再早少少，聽講排頭位嗰個三點幾就黎咗」，她終得償所願，抱得美鴨歸。

收藏過百膠鴨的忠實粉絲李先生昨晨亦六時許排隊，守候近五小時亦成功購鴨。從事設計業的他二十多年來閱鴨無數，更練出獨家的驗鴨秘笈，「眼珠要對稱、同埋要睇吓鴨身有無甩色或者黑點」，他直言今批限量版因有盒保護，質素不錯，甚有收藏價值。他早於巨鴨首天亮相時已率先潮聖，花逾十二小時狂拍逾千張「巨鴨的日與夜」，並揚言天氣稍佳會再次觀鴨，瘋狂程度令人咋舌。

巨鴨旋風抵港，帶來無限創意及商機。有愛好藝術的青年亦湊熱鬧，昨首天擺檔銷售自家設計、融合本土特色的鴨子明信片；更有專業攝影師組團招鴨照，盼收集一千張擁抱鴨仔照片拼貼為「維港鴨仔圖」，轉寄至巨鴨爸爸霍夫曼，分享港人創意。