南丫島撞船發生半年多後，政府終於不完整地公布海難事故調查委員會報告，揭示出海事處過去廿年來嘅混帳，該處人員無論喺審批船隻設計圖則、監督建造及檢驗過程，全部非常求其，幾乎每個階段都接二連三有多人犯錯，冇事發生，外界咪唔知囉。直至去年十月一日，終於發生多人死傷嘅災難。海事處處長廖漢波前日喺記者會上，拒答會否引咎辭職，亦都拒向死難者及家屬道歉。咁搞法，同蒙住對眼揸船有乜分別啫？
